Programi i studimit Master Profesional në “Menaxhim Bankar dhe Financiar”

Programi i studimit Master Profesional në “Menaxhim Bankar dhe Financiar” është licencuar me Urdhër Nr. 176, datë 26.04.2012, akredituar me Urdhër Nr.441, datë 25.08.2016, Programi i studimit Master Profesional në “Menaxhim Bankar dhe Financiar” është riakredituar me Vendimin e Bordit të Akreditimit nr. 53, datë 05.07.2019, me një kohëzgjatje prej 3 (tre) vite akademike dhe me vlefshmëri deri në datën 30.09.2022. 

Në vitin akademik 2018-2019 për herë të parë u implementua programi i riorganizuar me 60 kredite ECTS. Duke nisur nga viti akademik 2018-2019, programet master professional ofrohen me një kohëzgjatje prej 1 viti akademik, pra të ndarë në dy semestra. Gjatë semestrit të parë studenti angazhohet në ndjekjen e leksioneve dhe seminareve, duke grumbulluar në përfundim 30 ECTS nga semestri i parë, ndërkohë në semestrin e dytë përveç leksioneve dhe seminareve angazhohet në ndjekjen e praktikës profesionale dhe punimit të temës së diplomës, mbrojtjen e së cilës do ta bëjë në përfundim të semestrit të dytë duke grumbulluar të njejtin total kreditesh. 

Në muajin Prill u përcoll dosja e riakreditimit në NjSBC, pas realizimit të procesit të riakreditimit. Nga data 21-22 qershor 2022 u realizua procesi i akreditimit të jashtëm, dhe pritet Vendimi i Bordit të Akreditimit. 

Ky program përgatit specialistë të lartë të sektorit bankar si edhe menaxherë dhe konsulentë në këtë sektor, nëpërmjet ofrimit të njohurive dhe shprehive të nevojshme teknike dhe menaxheriale për të krijuar një karrierë të suksesshme në sektorin bankar apo institucione të tjera financiare. 

Synimi themelor i këtij programi studimi lidhet me kontributin në rritjen e cilësisë profesionale të diplomuarve të ciklit të pare të studimeve Bachelor, apo të sistemit të vjetër dhe që duan të vazhdojnë më tej karrierën profesionale duke u specializuar në fushën e menaxhimit. 

Ai i profilizon studentët në fusha të ndryshme të drejtimit financiar duke i ofruar njohuri mbi ligjësitë e përgjithshme të tregut, institucionet e ndërmjetësimit financiar, mbi modelet dhe vizionet bashkëkohore të strukturave institucionale, mbi pozicionimin e firmave në ambientin financiar në kontekstin e globalizimit dhe integrimit europian. 

Programi gjithashtu stimulon aftësitë praktike për analiza ekonomike të treguesve financiarë dhe përdorimin e tyre në çështje kombëtare dhe rajonale nën raportin e standardeve dhe rregullave të profilit. Të diplomuarit e këtij cikli pajisen me aftësi të planifikimit financiar dhe kompetenca argumentuese dhe këshilluese për institucionet të ndryshme në fushën e ekonomisë.